كتبت /هاله حمدي
كتير بنركز على اللي الناس بتعمله معانا وننسى نبص على تصرفاتنا احنا مع إن الحقيقة إن كل فعل بنعمله بيرجع يأثر علينا بشكل أو باخر
لما تساعد حد محتاج حتى لو بحاجة بسيطة بتحس براحة من جواك ولما تقول كلمة حلوة أو تقف جنب حد في وقت صعب، بتلاقي نفسك مرتاح أكتر مش لأن الناس شكرتك لكن لأن الإحساس اللي جواك اتغير
وفي المقابل لما نظلم حد أو نجرح حد بكلمة حتى لو محدش عرف بيبقى فيه شعور مش مريح جوانا ممكن نحاول نتجاهله لكنه بيفضل موجود وياثر على نفسيتنا من غير ما ناخد بالنا
علشان كده، كل فعل بنعمله هو في الحقيقة رسالة بنبعتها لنفسنا قبل أي حد. وكل ما كانت أفعالنا فيها خير واحترام ورحمة، كل ما نفسيتنا كانت أهدى وحياتنا أخف
في الآخر مفيش حد كامل، وكلنا بنغلط لكن المهم إننا نحاول كل يوم نكون أحسن من اليوم اللي قبله لأن التغيير الحقيقي بيبدأ من أفعال بسيطة ومع الوقت بتفرق في شخصيتنا وفي راحتنا النفسية.
