أخطر مرض بيصيب أي بيت إن كل واحد شايف إن العيب في التاني
بقلم عمرو فكري
تخيل تدخل أي بيت فتلاقي الأب مقتنع إن ابنه محتاج يتغير والأم شايفة إن الزوج لازم يتغير والابن مقتنع إن أهله مش فاهمينه والبنت نفسها كل اللي حواليها يتغيروا وفي النهاية تكتشف إن كل واحد في البيت ماسك عدسة مكبرة على عيوب غيره وناسي يبص في المراية مرة واحدة والغريب إننا بنستغرب ليه المشاكل مبتخلصش مع إن كل واحد مستني التاني يبدأ الأول والحقيقة إن الإنسان بطبعه بيشوف عيوب غيره بسهولة جدًا لكنه بيلاقي ألف مبرر لنفسه ودي أكبر خدعة بيعملها العقل مع صاحبه لأننا بنفتكر إن الكلام هو اللي بيغير الناس بينما الحقيقة إن السلوك هو اللي بيغيرهم جرب تفتكر آخر مرة ابنك قلدك فيها هتلاقيه قلد تصرف عملته من غير ما تاخد بالك مش نصيحة قعدت تقوله عليها ولو كنت بتزعق في كل مشكلة متستغربش لما تلاقي العصبية بقت اللغة الرسمية في البيت ولو كنت بتطلب الاحترام وإنت بتتكلم بعصبية متستغربش لما محدش يسمع كلامك لأن الناس بتسمع بعينيها قبل ودانها وبتصدق الأفعال أكتر من الكلمات يمكن علشان كده فيه مقولة بسيطة لكنها عظيمة بتقول لا تحاول أن تربي أبناءك بل رب نفسك لأنهم سيصبحون مثلك سواء أردت أم لم ترد ودي الحقيقة اللي ناس كتير بتهرب منها لأن تغيير نفسك أصعب بكتير من انتقاد غيرك لكن نتائجه أعظم بكتير برضه تخيل لو بدأت من النهارده تسمع أكتر ما تتكلم وتعتذر لما تغلط وتشكر على أي حاجة حلوة حتى لو كانت صغيرة هتتفاجأ إن الجو في البيت بدأ يهدأ من غير أوامر ومن غير خناقات لأن الأخلاق معدية والهدوء معدي والابتسامة معدية زي ما العصبية والنكد معديين وفي الآخر قبل ما تسأل ليه أهل بيتي مش بيتغيروا اسأل نفسك سؤال واحد لو كل واحد في البيت بقى نسخة مني هل هكون فخور ولا هتمنى إنه يتغير لأن البيوت مش بيغيرها الشخص اللي صوته أعلى البيوت بيغيرها الشخص اللي شجاعته أكبر وشجاعة الإنسان الحقيقية إنه يبدأ بنفسه قبل ما يطلب من أي حد تاني يتغير
