“لو خيروك بين 100 مليون جنيه أو دخل مضمون مدى الحياة، هتختار إيه؟

بقلم عمرو فكري
ليه بقى الاهتمام بالدخل أهم من الجري ورا الثراء؟
في زمن السوشيال ميدياطبيعي تفتح الموبايل تلاقي واحد بيقولك إنه بقى مليونير في شهر والتاني اشترى عربية أحلامه من مشروع بدأه وهو نايم والثالث بيأكدلك إنك لو ما بقيتش غني قبل الثلاثين يبقى فاتك القطار
بس الحقيقة الاقتصاد عمره ما اشتغل بالطريقة دي
خلينا نسأل سؤال بسيط إيه اللي بيخلي أسرة تعيش مرتاحة؟
هل إنها تكسب مبلغ ضخم مرة واحدة؟ ولا إنها يكون عندها دخل ثابت يدخل كل شهر مهما كانت الظروف؟
الإجابة غالبًا واضحة. الدخل المستدام هو اللي بيدفع الإيجار ويجيب احتياجات البيت ويعلم الأولاد ويخلي الأسرة قادرة تخطط للمستقبل من غير خوف أما الثروة السريعة فهي في أوقات كتير بتكون مرتبطة بمخاطرة كبيرة ولو راحت ممكن يرجع صاحبها لنقطة الصفر
علشان كده، الدول القوية اقتصاديا مش بتركز بس على خلق أغنياء جدد لكنها بتركز على زيادة دخول المواطنين بشكل مستمر، وخلق وظائف مستقرة، وتشجيع الاستثمار والإنتاج لأن لما دخل ملايين الأسر يزيد حتى بنسبة بسيطة القوة الشرائية بتتحسن وحركة السوق بتنشط، والشركات تبيع أكتر فتوظف ناس أكتر وهكذا تدور عجلة الاقتصاد.
في المقابل، السعي وراء الثراء السريع بيخلي ناس كتير تدخل في استثمارات غير مدروسة أو مشاريع هدفها المكسب السريع فقط. ولو الأمور مشت عكس المتوقع، الخسارة بتكون أكبر من المكسب اللي كانوا بيحلموا بيه
وده مش معناه إن تحقيق الثروة حاجة وحشة، بالعكس. لكن الثروة الحقيقية غالبًا بتكون نتيجة سنوات من العمل والاستثمار والصبر وتراكم الدخل مش ضربة حظ أو تريند مؤقت
الفرق كبير بين شخص عنده عشرة ملايين جنيه لكن من غير مصدر دخل ثابت وشخص دخله بيزيد سنة بعد سنة وعنده استقرار مالي الأول ممكن يفقد جزءًا كبيرًا من ثروته مع الوقت أما الثاني فبيبني مستقبلًا يقدر يستمر لعشرات السنين
من الاخر الهدف مش إنك تبقى غني في أسرع وقت لكن إنك تبني دخلا يفضل معاك ويكبر مع الوقت، ويضمن لك ولأسرتك حياة مستقرة. لأن الاقتصاد في الآخر مش سباق مين يكسب أسرع لكنه سباق مين يقدر يستمر