كتبه:- اسلام سلامة
في قرارات كتير في حياتنا بنبدأها من غير ما نفكر في نتائجها على المدى الطويل عادة بسيطة تدخل يومنا ونقول عادي تجربة مع صحاب وقت ضغط او لحظة توتر وبعد فترة نكتشف ان اللي بدأ كاختيار بسيط بقى عادة صعبة التحكم وده بالضبط اللي بيحصل مع التدخين
البداية غالبا مش بتكون مخيفة سيجارة مع صاحب تجربة في قعدة او محاولة للهروب من ضغط اليوم لكن المشكلة ان القرار اللي بيبدأ بسيجارة ممكن يتحول مع الوقت لاحتياج يومي والاحتياج اليومي ممكن يفتح باب لمخاطر على الصحة والمال والبيت والحياة كلها
الفكرة هنا مش التخويف لكن الفهم زي ما صاحب المشروع الذكي ما يدخلش مشروع من غير ما يسأل نفسه ماذا لو التكلفة زادت او المبيعات قلت او المورد اتأخر لازم اي شخص قدام عادة زي التدخين يسأل نفسه ماذا لو الموضوع كبر ماذا لو بقيت محتاج السيجارة كل يوم ماذا لو صحتي اتأثرت ماذا لو فلوسي بتروح كل شهر على عادة بتضرني ماذا لو ولادي او اللي اصغر مني شافوا التدخين حاجة عادية
ادارة المخاطر في التدخين معناها اننا ما نستناش المشكلة لما تكبر ما نستناش الصحة تشتكي ولا النفس يبقى قصير ولا المصاريف تزيد ولا العادة تتحكم في اليوم كله لان الوعي المبكر بيحمي والفهم قبل الازمة ارحم من الندم بعدها
التدخين زيه زي اي خطر ممكن يبدأ صغير لكنه لو ما اتحسبش صح ممكن يكبر الخطر الاول هو الصحة لان الجسم بيتأثر مع الوقت حتى لو الانسان مش حاسس من اول يوم والخطر التاني هو التعود لان السيجارة ممكن تتحول من اختيار الى احتياج والخطر التالت هو المال لان المصروف اليومي البسيط لما يتجمع على شهور وسنين بيبقى رقم كبير والخطر الرابع هو البيت لان التدخين مش بيأثر على صاحبه بس لكنه كمان بيأثر على اللي حواليه والخطر الخامس هو الصورة لان الابن او الاخ الاصغر او الصاحب ممكن يقلد السلوك طالما شايف شخص قريب بيعمله
كتير من المدخنين بيقولوا انا اقدر ابطل في اي وقت او انا بدخن قليل او انا لسه صغير او الموضوع مش مأثر عليا دلوقتي لكن ادارة المخاطر معناها انك تفكر قبل ما العادة تكبر وتبقى اقوى منك لان المشكلة مش بس في عدد السجائر المشكلة في الارتباط اللي بيتكون مع الوقت سيجارة بعد الاكل سيجارة مع القهوة سيجارة وقت الزعل سيجارة وقت الانتظار ومع كل ارتباط جديد العادة بتثبت اكتر
علشان كده السؤال المهم مش بس ازاي ابطل السؤال الاول هو انا بدخن ليه هل بسبب ضغط هل بسبب توتر هل بسبب صحاب هل بسبب فراغ هل بسبب عادة مرتبطة بموقف معين لما نفهم السبب نقدر نبدأ نغيره لان الاقلاع عن التدخين مش مجرد قرار مفاجئ لكنه فهم للمواقف اللي بتضعفك وتجهيز لبدائل تساعدك وقتها
لو السيجارة مرتبطة بالقهوة غير الروتين ولو مرتبطة بالتوتر دور على طريقة تهدئة تانية ولو مرتبطة بالصحاب قلل القعدة اللي بتشدك للتدخين في البداية ولو مرتبطة بالفراغ املا وقتك بحاجة تتحرك فيها ولو مرتبطة بالضغط اطلب دعم من شخص قريب او مختص المهم انك ما تواجهش العادة بنفس الطريقة القديمة وتستغرب ان النتيجة ما اتغيرتش
زي ما المشروع الناجح مش اللي مافيهوش مشاكل لكن اللي مستعد لها الاقلاع الناجح مش اللي مافيهوش لحظات ضعف لكن اللي صاحبه مجهز نفسه للحظات دي عارف هيعمل ايه لما تجيله الرغبة عارف هيكلم مين لما يضعف عارف هيبعد عن ايه في اول فترة وعارف ان الانتكاسة لو حصلت مش معناها النهاية لكنها معناها ان الخطة محتاجة تعديل
الخطر الحقيقي مش في ان التغيير صعب الخطر الحقيقي اننا نفضل نأجل كل يوم تأجيل بيدي العادة مساحة اكبر وكل مرة نقول بعدين بيبقى القرار ابعد لكن البداية ممكن تكون بسيطة تقليل عدد السجائر تغيير مكانها ابعادها عن متناول اليد تحديد اوقات ممنوع فيها التدخين طلب دعم من شخص موثوق او زيارة طبيب عند الحاجة
التدخين مش مجرد سيجارة هو قرار بيتكرر كل يوم والاقلاع كمان قرار بيتكرر كل يوم الفرق ان قرار التدخين بياخد من صحتك ومالك وراحتك مع الوقت اما قرار التوقف بيرجعلك السيطرة خطوة بخطوة
علشان كده الوعي بالتدخين مش تخويف وادارة مخاطره مش تشاؤم لكنها استعداد وفهم ومسؤولية اللي عايز يحافظ على حياته ما يستناش الخطر لما يكبر واللي عايز يغير عادة ما يستناش اللحظة المثالية ابدأ من دلوقتي افهم سبب التدخين احسب مخاطره جهز خطتك اطلب دعم وامشي خطوة خطوة
الحياة الصحية مش هي الحياة اللي مافيهاش ضغوط لكنها الحياة اللي صاحبها يتعلم يواجه الضغوط من غير ما يضر نفسه والقرار القوي مش اللي مافيهوش صعوبة القرار القوي هو اللي مستعد لها
