بايدك تقدر تغير حياه

كيف يصبح كل فرد سببًا في نهضة من حوله
بقلم: عمرو فكري
تخيل لو كل واحد فينا صحى الصبح وهو ناوي يخلي شخص واحد بس أحسن من امبارح شوية يمكن علمه معلومة يمكن شجعه على خطوة كان خايف منها يمكن ساعده يلاقي شغل أو حتى سمعه باهتمام من غير ما يحكم عليه
الغريب إن النهضة عمرها ما بدأت بقرارات كبيرة بس النهضة الحقيقية بدأت لما ناس عادية قررت تكون مفيدة للي حواليها المدرس اللي بيحبب طالب في العلم ممكن يغير مستقبل أسرة كاملة والأب اللي يربي أولاده على الأمانة ممكن يطلع جيل يبني بلد والطبيب اللي يعامل مرضاه باحترام بينشر الثقة قبل العلاج وصاحب الشغل اللي يدرب موظف جديد بإخلاص بيخلق شخص يقدر يعتمد على نفسه
الموضوع مش محتاج تكون غني ولا مشهور ولا صاحب منصب محتاج تكون مؤثر في المكان اللي أنت فيه لأن التأثير معدي زي ما الكسل بينتقل والحماس كمان بينتقل وزي ما التشاؤم بيعدي الأمل برضه بيعدي
كل كلمة حلوة ممكن تنقذ حد من اليأس وكل نصيحة صادقة ممكن تمنع غلطة كبيرة وكل فكرة صغيرة ممكن تتحول لمشروع يفتح بيوت وكل طفل نشجعه على السؤال بدل ما نسكته ممكن يبقى بعد سنين عالم أو مخترع أو رائد أعمال
المجتمعات القوية مش بتتبني بالأبطال الخارقيين لكنها بتتبني بآلاف الناس العاديين اللي كل واحد فيهم قرر يعمل دوره بإتقان ومن غير ما يستنى تصفيق ولا شهرة
في النهاية اسأل نفسك سؤال بسيط لو اختفيت من المكان اللي أنت فيه النهارده هل حد هيقول إن وجودك كان بيضيف حاجة لو الإجابة لأ فدي فرصة تبدأ من دلوقتي تكون الشخص اللي يسيب أثر طيب في كل مكان يروحه لأن نهضة أي مجتمع مش مسؤولية شخص واحد لكنها مسؤولية كل شخص قرر يكون سبب في إن الحياة تبقى أفضل ولو بخطوة صغيرة