انزل واشتغل الشغل مش عيب والعيب إنك تفضل واقف مكانة

يكتب علاء محروس
كل يوم بنقعد على القهوة أو بنقلب في السوشيال ميديا ونسمع نغمة البلد مفيش فيها شغل أو المستقبل مش واضح بس الحقيقة اللي لازم نواجه بيها بعض بكل صراحة هي إن الشغل موجود بس هو محتاج رجالة تدور عليه بجد وتتحرك الشباب هما طاقة أي بلد وعمودها الفكري والاقتصادي ولما بنقول توعية بالعمل احنا مش بنقولك انزل اشتغل أي حاجة وخلاص وأنت كارب وشك احنا بنقولك ابني نفسك الشغل مش مجرد فلوس بتدخل جيبك آخر الشهر الشغل هو اللي بيصنع شخصيتك بيعلمك إزاي تتعامل مع البشر وإزاي تحل المشاكل وإزاي تبطل عقلية المستهلك اللي مستني كل حاجة تجهز له وتتحول لشخص منتج ومؤثر ومفيش حد بيبدأ من فوق كل رجال الأعمال والناس الناجحة اللي بنشوف صورهم اليومين دول بدأوا من الصفر ويمكن تحت الصفر كمان الشغلانة البسيطة اللي ممكن تكون مستهون بيها النهاردة هي اللي بتديك الخبرة اللي الشركات الكبيرة بتدور عليها بكرة ونزولك السوق وتعاملك مع الناس بيفتح عينك على أفكار ومشاريع عمرك ما كنت هتعرفها وأنت قاعد في البيت وبدل ما تضيع وقتك في الشكوى اسأل نفسك أنا بعرف أعمل إيه وإيه المهارة اللي عندي وممكن تجيب لي فلوس العالم اتغير والنهاردة المهارة هي اللي بتحكم مش مجرد الشهادة اتعلم لغة ادرس مجال جديد على الإنترنت اتعلم صنعة أو حرفة أو افهم إزاي تسوق لنفسك كل ساعة بتحطها في تطوير مهاراتك هي استثمار حقيقي هيرجعلك أضعاف في المستقبل يا صاحبي الحركة بركة والسعي عمره ما كان عيب العيب الحقيقي هو الاستسلام والقعدة على الدكة في انتظار الفرصة السحرية الفرص مش بتيجي للي قاعد مستنيها الفرص بتيجي للي بيجري ويسعى ويتعب في مجاله انزل جرب اغلط واتعلم المهم متقفلش يومك وأنت واقف في نفس النقطة اللي بدأت منها الصبح بلدنا مش هتقوم وتتقدم إلا بوعي شبابها وبإيديهم اللي بتشتغل وبتنتج خد الخطوة النهاردة وسيب الباقي على ربنا