ازاي تتدمر دخلك

ازاي تتدمر دخلك
بقلم عمرو فكري
عارف إيه أغلى مكان ممكن تحبس فيه فكرة بمليون جنيه ؟
الاجابه هي دماغك
إحنا أوقات بنفتكر إن أحسن طريقة نحمي بيها الفكرة هي إننا منقولهاش لحد لكن الحقيقة إن الفكرة وهي لوحدها بتفضل بنفس الحجم إنما أول ما تخرج للنقاش بتبدأ تكبر
تخيل إن كل واحد بتتكلم معاه ماسك كشاف نور واحد ينورلك نقطة والتاني يوريلك مشكلة والتالت يفتحلك باب مكنتش شايفه أصلا وفجأة تلاقي الفكرة اللي كانت عادية بقت مشروع يستحق يتنفذ
عشان كده أكبر رجال الأعمال وأصحاب الشركات الناجحة مش بيقعدوا في أوضة مقفولة مع نفسهم لكن بيحضروا اجتماعات وملتقيات وبيسمعوا آراء ناس مختلفة لأنهم عارفين إن اختلاف العقول مش بيعمل خناقة لكنه بيخلق قيمة
وده مش معناه إنك تمشي ورا أي رأي لأن مش كل نصيحة تنفع لكن اسمع وقارن وفكر وخد اللي يطور فكرتك وسيب الباقي
الغريب إن ناس كتير بتدور على فكرة جديدة وهي في الحقيقة محتاجة بس تسمع وجهة نظر جديدة
ولو هدفك تزود دخلك أو تكبر شغلك متخليش غرورك يقولك أنا عارف كل حاجة لأن الفكرة اللي بتشاركها النهارده ممكن تكون السبب في الفرصة اللي تغير حياتك بكرة
يمكن أكبر استثمار تعمله في حياتك مش في سهم ولا عقار لكن في محادثة مع الشخص الصح