طرق الاستثمار السليمة وهذا الخلاصة

كتب : علاء محروس
كلنا نفسنا نكبر قرشين ونأمن مستقبلنا وبقينا نسمع كلمة استثمار في كل حتة بس الفكرة مش إنك تلم قرشين وترميهم في أي مشروع وخلاص ولا هي ضربة حظ بتصيب مع ناس وتخيب مع ناس النجاح في الاستثمار ليه كتالوج وأصول لو مشيت عليها هتعرف تحط رجلك على أول طريق النجاح بجد وعشان تنجح بجد وتعمل حاجة ليها قيمة لازم أول حاجة تبدأ باللي تفهم فيه يعني أوعى تحط فلوسك في حاجة مش فاهمها لمجرد إن الناس بتقول دي بتكسب لو مش فاهم البيزنس ده شغال إزاي وبيكسب منين يبقى بتخاطر بفلوسك على الفاضي ادرس واسأل وافهم الأول كمان بلاش تحط البيض كله في سلة واحدة ودي مش كلمة بتتقال وخلاص ده سر أمانك نوع استثماراتك شوية في حاجة أمان وعائدها معروف وشوية في حاجة تانية فيها حركة عشان لو واحدة ريحت شوية التانية تشيلها علطول وحاجة تانية مهمة جدا إن الاستثمار نَفَس طويل انسى فكرة الثراء السريع دي خالص الاستثمار الصح محتاج صبر ووقت عشان يكبر ويجيب همه سيب مشروعك ياخد دورته الطبيعية وماتستعجلش المكسب السريع اللي ممكن يطير في ثانية واوعى تنسى تبعد عن العاطفة وخليك مع الأرقام الاستثمار بيحب العقل والورقة والقلم أوعى تاخد قرار عشان حاسس إن المشروع ده هيكسب أو عشان صاحبك قالك يا عم توكل على الله دي هتروق السوق مابيعترفش غير بالأرقام والدراسة وفي الأول والآخر أحسن استثمار تبدأ بيه هو استثمارك في دماغك اتعلم مهارة جديدة واقرأ عن السوق وافهم الدنيا رايحة فين طول ما دماغك شغالة وبتتطور هتعرف لقطة الاستثمار الصح فين قبل غيرك الخلاصة النجاح في الاستثمار مش محتاج معجزة محتاج عقلية واعية ونَفَس طويل وخطوات ثابتة ومدروسة ابدأ صغير واتعلم واكبر خطوة بخطوة وهتلاقي نفسك وصلت للي بتتمناه وأكتر