أغلى بضاعة في العالم
فكرة بقلم عمرو فكري
تخيل معايا إنك دخلت محل ولقيت تيشيرتين شكلهم قريب جدًا واحد سعره 300 جنيه والتاني 30 ألف جنيه السؤال هو إيه الفرق هل القماش مختلف أوي ولا الخياطة معمولة في الفضاء الحقيقة إن الفرق الأكبر موجود في حاجة مش بتتشاف اسمها الفكرة أو البراند
زمان كانت الدول تتنافس على الذهب وبعدها على البترول ودلوقتي المنافسة بقت على الأفكار لأن الفكرة الواحدة ممكن تتحول لتطبيق يستخدمه مليار شخص أو لعبة تكسب مليارات أو شخصية كرتونية تفضل بتكسب فلوس حتى بعد عشرات السنين
علشان كده بقى فيه حاجة اسمها الاقتصاد الإبداعي وهو اقتصاد بيعتمد على العقل أكتر من العضلات وعلى الابتكار أكتر من المصانع
بص حواليك هتلاقي إن فيلم ناجح أو أغنية أو لوجو أو لعبة موبايل ممكن يحققوا أرباح أكتر من مصانع كاملة لأن الناس مش بتشتري المنتج بس هي بتشتري القصة والإحساس والثقة
وعشان كده أكبر شركات العالم بقت تستثمر في المصممين والمبرمجين وصناع المحتوى والمؤلفين لأنهم عارفين إن فكرة واحدة ممكن تغير شركة كامله
الدرس هنا بسيط لو عندك فكرة متستهونش بيها لأن أغلى ثروة في الزمن اللي إحنا عايشين فيه مش اللي في البنك ولا اللي تحت الأرض أغلى ثروة هي اللي جوا دماغك لأنها ممكن تكون بداية مشروع يغير حياتك كلها
