بقلم – آية عثمان
يوم بعد يوم الإقتصاد بيتغير من حوالينا ومصاريف المعيشة بتزيد زي الصاروخ وعشان كده وظيفة واحدة مبقتش تنفع عشان تقدر تعيش مرتاح ماديًا بالإضافة لإن استقرارك المالي مهم جدا وهيكون مضمون بوجود أكتر من مصدر دخل لأن الاعتماد الكامل على راتب شهري واحد ما هو إلا مخاطرة ومجازفة غير محسوبة أشبه بوضع البيض كله في سلة واحدة، وده وضع يخلي الأمان المالي للأسرة هش ومعرض للانهيار عند أول هزة اقتصادية.
فعلى سبيل المثال أول خيط المخاطرة هو غياب اليقين الوظيفي فالشركات والمؤسسات مهما بانت مستقرة، هتواجه أزمات مفاجئة تضطرها لإعادة الهيكلة أو الاستغناء عن العمالة وطبعًا خسارة الوظيفة فجأة ده معناه انقطاع شريان الحياة المالي الوحيد بشكل فوري، ده بالإضافة لإن التضخم المتزايد يتآكل باستمرار من القوة الشرائية للراتب الثابت وده بيصعب عليك ملاحقة متطلبات الحياة الأساسية من سكن وتعليم ورعاية صحية مع مرور الوقت.
وأخيرًا عشان تخرج من دايرة الصراع الحرجة دي محتاج تحول جذري في عقليتك المالية وده مش هيحصل إلا بالسعي إنك تعدد مصادر دخلك، وده مش معناه البحث عن وظيفة ثانية تستهلك كل يومك لكن بإنك تستغل مهاراتك الشخصية في العمل الحر على الإنترنت، أو الاستثمار المبسط في أصول تجبلك عائد سلبي زي السندات أو الأسهم أو حتى إطلاق مشروع جانبي صغير يعتمد على الشغف والخبرة، وعشان كل ده يتحقق لازم يكون عندك قناعة تامة إن وجود مصدر دخل إضافي ليك مهما كان بسيط في بدايته بيمثل ليك شبكة أمان حقيقية لأنه مش بس بيحميك من الأزمات المفاجئة ده كمان بيمنحك مرونة أكبر في اتخاذ قراراتك المهنية وبيفتحلك الباب لتحقيق طموحاتك المؤجلة وتأمين مستقبل مالي مستدام، لأن الأمان الحقيقي مش بحجم الراتب الحالي لكن في عدد الروافد المالية اللي بتغذي حسابك في البنك.
