غلطه هتسرق مستقبلك المالي

غلطه العمر ان تعتمد علي مصدر دخل واحد
بقلم عمرو فكري
تخيل إن حياتك كلها متعلقة بفيشة كهربا واحدة
أول ما الفيشة تتشد كل حاجة تطفي
مرتبك التزاماتك خططك وحتى راحة بالك
وده بالظبط اللي بيحصل لما تعتمد على مصدر دخل واحد
المشكلة إن أغلب الناس فاكرة إن الأمان هو الوظيفة
لكن الحقيقة إن الأمان مش في الوظيفة
الأمان إنك لو فقدتها متقعش
زمان كان أبوك يشتغل في نفس المكان تلاتين سنة ويطلع معاش
النهارده شركة عملاقة ممكن تعمل تسريح موظفين في أسبوع
ومهنة كاملة ممكن يقل الطلب عليها بسبب التكنولوجيا
يعني الخطر مبقاش إنك مبتشتغلش
الخطر إنك تشتغل في اتجاه واحد بس
خليني أسألك سؤال
ليه أكبر المستثمرين في العالم بيشتروا أسهم في شركات مختلفة وعقارات ودهب وسندات
مع إنهم يقدروا يحطوا فلوسهم كلها في حاجة واحدة
الإجابة بسيطة لأنهم فاهمين إن التنويع بيحمي قبل ما يكسب
ونفس الفكرة تنطبق عليك
لو عندك مرتب ومعاه شغل حر
أو مشروع صغير أو استثمار
أو حتى مهارة بتجيبلك دخل من وقت للتاني
فأنت كده مش بتجمع فلوس وبس
أنت بتبني شبكة أمان
والجميل في الموضوع إن معظم مصادر الدخل الكبيرة بدأت وهي صغيرة لدرجة إن أصحابها نفسهم مكانوش متوقعين توصل لكده
قناة على الإنترنت كانت هواية
تطبيق بدأ في أوضة
مشروع بيتباع من البيت
أو مهارة اتعلمها صاحبها في وقت فراغه
الفرق الحقيقي مش إن الناس دي كانت أذكى
الفرق إنهم بدأوا
وفيه معلومة اقتصادية ناس كتير بتغفل عنها
زيادة الدخل أهم من تقليل المصروف
لأن المصروف له حدود
إنما الدخل ملوش سقف
تقدر توفر ألف جنيه
لكن تقدر تزود دخلك عشرة آلاف
وعشرين ألف وأكتر
عشان كده بدل ما تسأل كل سنة هو المرتب هيزيد كام
اسأل نفسك سؤال مختلف
أنا أقدر أبني كام مصدر دخل خلال السنة دي لأن في النهاية
الفلوس مش بتحب الشخص اللي بيجري وراها الفلوس بتحب الشخص اللي يعرف يخلق قيمة في أكتر من مكان
وساعتها هي اللي بتدور عليه