“الحاجه ام الاختراع ” ابنك مشروع مخترع

"خلي بال من طفلك "بقلم عمرو فكري
الطفل اللي بيقول ليه وازاي هو مشروع مخترع
عارف أكتر كلمة بتتعب أي أب وأم ليه وازاي
ليه السما زرقا
ليه الطيارة بتطير
ازاي الموبايل بيكلم حد بعيد
ليه السمك مبيغرقش
وبعد أول خمسين سؤال بيبدأ الرد الشهير يا ابني اسكت شوية
بس الحقيقة إن الطفل اللي بيغرقك في الأسئلة مش بيحاول يرخم عليك هو ببساطة بيبني مخه طوبة فوق طوبة
كل سؤال بيسأله هو محاولة يفهم العالم بنفسه مش يحفظه وخلاص
ولو بصيت على أغلب المخترعين والعلماء هتلاقي إن البداية مكانتش معمل ولا جامعة البداية كانت سؤال صغير جدا ليه
ليه الحاجة دي بتحصل
وازاي أقدر أخليها أحسن
كل اختراع عظيم بدأ بطفل رفض يقتنع بكلمة عادي
عشان كده لما ابنك يسألك متعتبرش السؤال صداع اعتبره استثمار
مش لازم تكون عارف كل الإجابات يكفي إنك تقوله تعالى ندور سوا
الجملة دي بتعلمه إن المعرفة رحلة مش درس وإن البحث أهم من الحفظ
يمكن السؤال اللي مضايقك النهارده يبقى بعد عشرين سنة السبب في اختراع يغير حياة ملايين البشر
فالمرة الجاية لما تسمع ليه وازاي متتنهدش ابتسم لأن قدامك يمكن يكون مشروع مخترع لسه في أول سؤال