عايز تبدأ مشروعك صح نصيحة مني ابعد عن القروض في بداية تأسيس مشروعك..
الحكاية بكل بساطة إنك مش هتعرف تسدد الديون اللي عليك من القرض اللي أخدته من البنك، لأن قيمة الديون وتكاليف المشروع من تشغيل ومصاريف عمالة أكبر من القرض نفسه، ده أولًا..
وكمان الأرباح اللي هتيجي من المشروع مش هتكفي لتسديد القرض، عشان كده مشروعك مش هيكبر، بل بالعكس مشروعك هيفشل وهو لسه في بداية الطريق..
طب أعمل إيه عشان أبدأ مشروعي صح؟
اشتغل على قد فلوسك في البداية، واشتغل صح، وخطط لكل خطوة بعقل وبفكر، واتعلم من الناس اللي فاتحين مشاريع ناجحة واعمل زيهم، وإن شاء الله ربنا هيرزقك ومشروعك يكبر.
طب إزاي أختار فكرة مشورع تجاري مُربح؟
دوَّر عن فكرة مشروع صغير يتناسب مع شخصيتك ومهاراتك، وشوف السوق محتاج إيه من حواليك، وإيه الفكرة اللي لسه محدش عاملها قبل كده وابدأ اعملها إنت.
مثال عملي: لو محدش في منطقتك عامل فكرة مشروع زي مثلًا محل لبيع الاسكوتر الكهربائي، جرب إنت وافتح المشروع ده ليه لأ!
الخطوة التانية وهي لازم تعمل دراسة جدوى للمشروع عشان ينجح،
طب ببساطة كده أعمل ده إزاي؟
لو خدنا مثلًا المثال اللي قولناه وهتفتح محل لبيع الاسكوتر الكهربائي لازم تعرف حجم الطلب على شراء الاسكوتر ده في منطقتك، وكمان لازم تحدد الموردين، وتحسب التكاليف المطلوبة عشان تبدأ المشروع وتأجر محل كويس وتجهيزه في منطقة كويسة.
الخطوة الثالثة وهي لازم تحط خطة عمل مظبوطة
خطة العمل دي دليل أو خط هيرشدك عشان تبني مشروع مُربح صح.
دراسة الجدوى هي الأساس: دي أول وأهم خطوة عشان تضمن إن مشروعك يقف على رجله وينجح، لأنها بتفصّص الفكرة من كل الجوانب «فلوس، وتسويق، وإدارة».
احسب حسبتك صح: لازم تقعد، وورقة وقلم وتحسب كل مليم هتدفعه في الأول؛ من أول المعدات والمواد الخام، لحد مرتبات الموظفين ومصاريف الدعاية.
افهم السوق ومنافسينك: الموضوع مش فلوس وبس، لازم تنزل السوق وتشوف هل الناس محتاجة اللي بتقدمه؟ ومين بينافسك؟ ادرس نقط قوتهم وضعفهم عشان تعرف تتميز عنهم.
القرار يبان من الأرقام: في الآخِر، هتشوف العائد المتوقع؛ لو الأرقام مُبشرة وفيها مكسب حلو، سمِّي واشتغل، لو لقيت العقبات كتير والمكسب مش جايب همه، يبقى تفرمل وتعيد حساباتك وتعدل الفكرة قبل ما تغامر بفلوسك.
